PAUWI NA. Matagal din bago nakakuha ng inspirasyon para magsulat. Naging abala din sa pagdalaw at pamamaalam sa mga pamayanan sa kailugan. Puno ang aking puso ng galak at pagmamahal sa lahat ng mga handog ng pagkilala, pasasalamat, at papuri. Tatlong taon din ang paglilingkod na ito na maraming kapalit. Yan ang totoo. Sa aking tantiya, mas marami akong nakuha kaysa sa naibigay. Uuwi akong mayaman sa karanasan at pagkilala sa sarili, simbahan at Diyos.///// KUWARESMA. Talikdan ang sala, at sa ebanghelyo sumampalataya. Nabatid ko sa pagbabasa na ang Kuwaresma ay halaw sa salita na ang ibig sabihin ay SPRING. Ito ang panahon ng bagong buhay mula sa panahon ng kamatayan dahil sa niyebe (snow). Ito ang paanyaya ng Kuwaresma, magkaroon ng bagong buhay. At dalawa ang yugto ng paanyaya, PAGBITAW at PAGKAPIT. Bumitaw sa anumang hadlang sa Kalooban ng Diyos at kumapit sa Kanyang Kalooban. Ito ang magbibigay ng bagong buhay.///// TRANSFIGURE. Kung susuriing maigi, hindi naman talaga si Hesus ang nagbago sa Bundok ng Tabor. Ang paningin o pananaw ng mga alagad ang nabago. Si Hesus ang Alpha at Omega, Diyos noon, ngayon at magpasa walang hanggan. Nabago din ang kanilang puso kasi nga ay nakita nila ang totoo. Ito ang aral ng misyon sa akin. Sa katunayan ang pagkapari, simbahan at Diyos ay ganito na noon pa subalit kinailangan ng misyon para mabuksan ang aking mga mata at mabago ang aking pananaw, kasama na ang puso. Ang misyon ang Bundok ng Tabor. //// Marami sa atin ay nakaranas na ng ganito. Ang iba ay sa Marriage Encounter, Life in the Spirit Seminar, 30-day retreat, etc. Ganoon na talaga ang Marriage, Espiritu Santo, All-loving God etc., pero di pa lang nabubuksan ang ating mga mata. Ika nga, pikit tayong nabubuhay. O bulag sa nandito o nandyan ng katotohanan. Tulad ng mga alagad mababago ang puso kung mababago ang pananaw. Ayon kay Mike Murdock, “Everything you need is already in your life, merely awaiting your recognition of it. Anything unrecognized remains uncelebrated by you. Anything you refuse to celebrate eventually exits your life. Don’t miss that chance.///// NAKIKINIG AT NAGMAMASID PALA. Nasaling ang puso ko sa ginawa kong powerpoint summary ng missions. Naiyak ako sa sarili kong gawa nang mapanood ko ito nang buo kasama ang mga Lay Ministers. Nabatid ko na ang aking pinapanood ay mga alaala na lamang, larawan ng lumipas.. di na mauulit. Natanto ko na ang mga taong kapiling ko sa misyon ay magiging “noon,” at marahil ay di na makakasama muli. Kasama na roon ang mga ilog, dagat, manok, halaman, sariwang hangin, walang kuryente atbp. Hindi ako makapagsalita, kaya’t lumabas muna ako para tipunin ang sarili.///// Marami sa mga pamayanan na naghandog ng palatuntunan at piging makatapos ang misa ay nagpahayag ng pagkilala sa inyong abang lingkod. Pakiramdam ko talaga pinaka-pogi at pinaka- mahusay na akong misyonero sa mga sinambit nila!! (hahahah) Pero isa ang napatunayan ko, nakikinig sila sa homiliya! Inulit nila ang ilan sa mga nakasaling sa kanila. Hindi lang yun, nagmamasid din sila ng kilos, salita, pakikitungo (cf www.mspguyana.zoomshare.com/blog)///// PINOY POWER. Pag-alis ko sa Northwest, nanatili ako sa Georgetown para makapapag-paalam din sa mga kaibigan at sa Obispo. Naghanda rin ng tanghalian ang mga Kabataan. Pero napakaraming inihanda ng mga Pinoy para sa Despedida sa bahay nila Joel-Arlene. Naulit pa muli ang Despedida kasi hinintay ko pa si kabayang Rene na magsasama sa akin sa Suriname (a.k.a. Dutch Guyana). Talagang may Pilipinas sa Guyana: karaoke, inuman, madjong, kainan, kantiyawan, sayawan., higit sa lahat DAMAYAN. Kapag merong may sakit, kailangan ng matutuluyan o kontak, text o tawag lang, parang magkakapatid. Nagtulungan din kami para sa mga Pinoy na napagsarhan ng kumpanya, at inipit ang passports nila. Maayos na sila ngayon sa tulong din ng Embahada sa Brazil. Sa kasalukuyan, nandito ako sa Suriname. Nagmisa ako sa mga Pilipino na nagtatatrabaho sa Caterpillar at sa Fishing Company sa bahay ng isang Pinoy na Duktor. Ayun kay Dr. Abulos, sa 37 taon nila dito, ito ang kauna-unahang misa ng mga Pinoy sa Suriname(LIMASAWA pa ang dating!) Bahagi pa tayo ng kasaysayan, o di ba? /////3March2008