PATOK: “Kumatok ka at ikaw ay bubuksan…” Sa misyon, magbukas ka at maraming kakatok… Pagbubuksan mo ba? Nalalapit na ang pagtatapos ng yugtong ito ng ating paglalakbay. Malinaw sa akin na hindi lang ako ang nag-misyon kasi sinamahan n’yo naman ako sa tatlong taon ko sa Guyana. Biruin n’yo yun, nakatagal ako (ay, sila pala!). Patok ang misyon kasi nabulabog muli ang aking idealismo. Habang tumatagal ka sa anumang piniling kalalagyan, magkakaroon ka na doon ng kasanayan. Sanay at nahirati ka na sa mga nakagawian at ayaw mo na minsan ng pagbabago. Parang ang lahat ay maayos na, kontrolado, plantsado. ‘Ika nga, mayroon ka ng kumot- pangkaligtasan. Gusto mo na lang manatili sa iyong “kubong-ligtas.” Aalisin ang kumot at papalitan ang kubo ng misyon, kaya’t kakailanganin mo talaga yung tunay na Tagapagligtas. At sa totoo lang, literal na wala kang kontrol at plantsa dito (wala ngang kuryente eh!) Madarama mo muli na Siya ang may kontrol at nagpa-plantsa na maraming bagay. Di ikaw. Yun ang patok! ///// TOPAK: Di naman talaga kailangang sira ang ulo mo para maging misyonero. Konti lang. Kasi nga pwede namang hindi, bakit ba naisipan ko ito? Tatlong taon na yang tanong na yan sa akin ng marami, May sagot na ba ako? Meron na. Pwede sigurong sabihin, tinopak ako. Marahil kailangang merong dapat isuko, di lang sa mga nakasanayan, kundi pati na rin ang angking karunungan para magbigay daan sa “katopakan” ng misyon. Kasi nga wala ka namang kita (pero marami kang makikita sa sarili, pagkapari, simbahan at Diyos); malayo sa mga mahal sa buhay (pero mas dama mong mahal ka); mahirap (pero masaya). Kung kalokohan ang misyon, may kinalolokohan talaga ang mga misyonero! Sadyang di kayang ipaliwanag nang lubos kung ano nga ba ang narito, pero saksi akong nagpapatunay na maganda at maligaya sa misyon. Kaiba talaga! At maiiba ka rin depende sa pagbubukas mo sa mga kumakatok. (Wag lang ikaw ang kumatok tulad sa makina, ha?!) ///// POTAK (putak): Hindi ito tungkol sa mga manok na alaga ko pero pwede ring isali sila. Pagkatapos nilang mangitlog, abot ang putak nila. Maiingay sila, na para bagang ipinababatid sa lahat na nangitlog na sila. Ang misyon ay hindi na isang salita na lumulutang sa alapaap ngayon. Hindi na ito isang balangkas lamang. Pero mananatili itong salita/putak (o “kalembang na hungkag”) kung hindi ito magsasa katawang-tao. Nagkataon, isa ako sa di karapat-dapat na maging misyonero, Dapat tumuloy ang misyon na pumutak para mabatid ito ng madla. Sana naman di lang itlog ang dala ko pauwi. Nawa di lang ingay, sana. Ang blogs ang nakasulat na pagputak sa mga nangyayari sa misyon. Sa katunayan isa rin itong paraan para lagi kong maala-ala ang salamangka ng misyon. Alam kong mahikli ang memorya ng tao. Umaaamin na rin ako sa pagiging malilimutin (di pa naman ulyanin) ///// TAPOK: Mas matindi ang dagok kesa sa tapok. Pwede kang malugmok sa dagok, sa tapok ulo lang ang tama o batok kaya. Ang dami kong tapok na inabot sa misyon. Mga panggising na mga paala-ala. Magbibigay ako ng tatlo. Una, payapa ang pakiramdam pag alam mo na ang Diyos ang bahala. Yung bang sagot ka Niya. Na di mo naman talaga alam lahat ang sagot. Pangalawa, sa parokya na may 10,000 mananampalataya kasama ang pari, ang tatlong magagawa ng pari na di magagawa ng 9,999 na mga katoliko sa parokya ay magmisa, magpa- kumpisal, magpahid ng santo oleo. Hindi dapat ipagkait ang panahon sa mga ito kasi ikaw lang ang makakagawa noon. Pangatlo, malayo na ang naabot at aabutin pa ng pananampalatayang Pinoy. Nakakaaliw na isipin na dala-dala natin kahit saan tayo pumunta ang ating pananampalataya. Ipinagmamalaki kong lagi kung paano tayo sumamba at magpahalaga sa Diyos. At talagang epektib tayo kasi apektib tayo (effective ‘coz affective). ///// Kahit ang mga pari at obispo pati mga parokyano ay nagugustuhan ang ating personal approach. Natutuwa sila na ang Pilipinong misyonero ay mahusay pumutak (magpahayag); na may konti o malaking topak (mapagbiro); handang manapok o tumanggap nito (may tapang); at higit sa lahat… patok siya sa takilya (artistahin baga!) ///// Huwag ka nang umangal o kumontra! Kasama yan sa tapang namin…as in tapang ng apog! Mabuhay! ///// 11Nov2007